بينهما برزخ لا يبغيان

“مرج البحرين يلتقيان* بينهما برزخ لا يبغيان” …آيتين من آيات الإعجاز العلمي في القرآن الكريم في صورة الرحمن

إفتح كتب التفسير و المواقع الدينية علي النت حتلاقي تفسير الآية هو إلتقاء بحرين أو بحر و نهر دون إختلاطهما…و هو فعلا من إعجاز الخالق سبحانه و تعالي …و غالبا حتكون مصحوبة بالصورة دي

بس زي ما أنا معودكم في البلوج إني بأشوف الأشياء بمنظور مختلف…حتي عنوان المدونة هو “شوفها بطريقتي” …لي تفسير أخر للأيه دي
و لعلي أكون قد أصبت

من إعجاز ربنا في خلقه إنك تحط حاجتين علي بعض و تقلبهم و برضه يفضل كل شئ لوحده…زي المياة و الزيت كده و ده بفضل حاجة بسيطة جدا وهو إختلاف الكثافات

و من فضل ربنا و إعجازه إن مادة خام واحده تعمل حاجتين مختلفتين تماما

أنا بقي بحكم مجالي في الطب حأفسر الأية دي طبيا…زي ما بأحب أفسر كل الأيات كده…عشان أكون فعلا بأدرس الطب و في نفس الوقت بأتدبر في خلق ربنا…و عشان ربنا إداني مخ أستعمله…و الأهم من ده كله عشان أثبت إن القرآن الكريم لكل موقف و زمان و مكان..مش زي ما بعض الناس فاكرة إن كل آيه كان ليها سبب نزول و موقف و خلاص إنتهي الموقف ده بإنقضاء الزمن

من عجائب خلق ربنا في جسم الإنسان هو العين…فيها أسرار و إنبهارات لا تنتهي …و هي الفضل في إختراع الكاميرا..احد أهم و أعظم إختراعات التاريخ

و فيها كمان تفسير الآيه اللي بأتكلم عنها
..الجزء القادم هو الجزء الطبي

في منطفتين في العين واحده إسمها القرنية و هي الجزء الشفاف اللامع الللي في منتصف العين اللي بيبان من وراه لون العين سواء أزرق أو بني أو أيا كان….و جزء إسمه الصلبة و ده اللي لونه أبيض اللي جنب القرنية

أقولكم مفاجأة؟؟ الإتنين دول معمولين من نفس الأنسجة…مش بأقول أنسجة متشابهه..لأ نفس الأنسجة بالظبط…يعني النسيج اللي ماشي في القرنية بيكمل عشان يعمل الصلبة

قلت سبحان الله؟؟ طب إزاي بقي

القرنية هي الجزء اللي النور بيعدي منه عشان كده لازم تبقي شفافة و الصلبة هي الجزء اللي مش بيعدي نور عشان كده لازم تمنع مروره
و هم معمولين من نفس الخيوط و الأنسجة…الفارق الوحيد هو ترتيب الأنسجة دي..أه ولاهي هو ده الفارق الوحيد..سبحانك يارب

في القرنية الأنسجة ماشية بالتوازي مع بعض و فوق بعض بإنسجام عشان كده شفافة…و بمجرد أن تصل الأنسجة لنهاية القرنية..بتبتدي تتداخل علي بعض و يتلخبطوا و ده اللي بيعمل اللون الأبيض و يخليها مش شفافة

هل تقدر إنت تعمل إزاز يكمل بلاستيك من نفس مواد الخام ..مجرد إختلاف في الترتيب؟؟ لأ

و فعلا بينهما برزخ لا يبغيان

شوف الصورة دي

الأنسجة عارفة طريقها و عارفه حتتغير إمتي…بيمنهم خط رفيع فاصل عمره بما بيخش في بعض…عمره…بينهما برزخ لا يبغيان

من الأمثله الأخري لهذه الأيه هو وجود الجنين في بطن أمه
بيكون مصدر أكله و شربه و تنفسه هو دم أمه من خلال الحبل السري..و مع ذلك دمه غير دم أمه…و لا يختلطان ببعض أبدا…سبحان ألله

يعني بيأكل و يشرب و يتنفس من دمها و مع ذلك عمر ما الدماء بتختلط مع بعض
ليه؟؟ عشان في بينهم حاجه إسمها Blood Placental Barrier …ترجمها كده…حاجز الدم المشيمي

حاجز يمنع إختلاط الدماء لخطورة إختلاطهما…بينهما برزخ لا يبغيان

أيا كان مجال دراستك أو شغلك…حاول تفسر أيات القران حسب اللي إنت بتشوفه…حتلاقي لها تفسير و إعجاز…إستفيد من دراستك و علمك في خدمة دينك…و إعرف عظمة خالقك