الصلاة…تحصيل حاصل

 

 

 

بسم الله الرحمن الرحيم

الصلاة…و ما أدراك ما أهمية الصلاة..هي شئ تاركها لن يفهم أبدا معني كلمة راحة البال و السعادة مهما كان ناجحا أو غنيا و هي عماد الدين و هي أحد فرائض الإسلام الخمس…لكن أنا عندي منظور آخر شايفها منه و متستغربش خالص…موضوع البلوج بتاعتي كله أصلا هو شوف الحياة من منظوري و أنا منظوري للحياة مختلف تماما عن المعتاد من الناس

كتير قوي قوي مننا بيفوت صلوات كتير و كتير مننا قوي تارك للصلاة خالص…كتير برضه في تقلبات …ساعات يصلي بإنتظام و ساعات يبطل…ساعات ينزل يصلي كل الصلوات جماعة و ساعات يسمع الأذان و لا كأنه سمع حاجة…طيب إيه؟؟ إيه العمل و الأهم إيه السبب؟؟

سؤال…دلوقتي إنت لو بتاخد درس 5 مرات في الأسبوع…كل مرة بتاخد واجب تعمله و حاجات تذاكرها اللي هي الدكتور شرحها في الحصة..و إنت ولا بتذاكر ولا بتعمل الواجب لدرجة إن جه عليك وقت بقيت تروح الدرس مش بتستفيد منه بأي حاجة و قاعد فيه زي قلتك لأنك مازكرتش أي حاجة من اللي فاتت و حاجات كتير متكومة عليك …لدرجة إنك بقيت تروح تضيع وقت …ساعتها حتروح تاني؟؟ الإجابة لأ حأروح أعمل إيه مش لما أخاص اللي عليا الأول…و بعدبن أنا كده أروح أسمع حاجات جديدة أعقد نفسي و خلاص…و كمان و ده الأهم الدكتور حيبقي مش طايقني من الإهمال اللي أنا فيه و عدم إهتمامي بمذاكرتي

هذا هو حال صلاتنا يا إخواني…أنا شايف  إن الصلاة دي بتعلمنا حاجات معينة و عبادات معينة و تهذيب للنفس عندما تسمع النداء لربك…طيب لو أنا نفسي لم تهذب حأصلي ليه؟؟ حأصلي بأنهي وش؟؟
لو أنا بأعمل بلاوي سودا و بأجي وقت الصلاة أصلي أكيييييد حييجي عليا يوم أبطل صلاة…حأتكسف أقابل ربنا باللي أنا بأعملة ده

الصلاة في رأيي هي تحصيل حاصل..هي نتاج الأخلاق الحميدة و العبادات الصحيحة …أصل الصلاة دي هي ال10 دقائق اللي بتقابل فيهم ربنا علشان تتواصلوا مع بعض..طيب تقابله ليه إذا كان حالك هباب أصلا؟؟ مش حيجيلك نفس أو قلب…حتتكسف

الصلاة تحصيل حاصل لأنه و عن تجربة إنت لما تكون مظبط كل حاجة في حياتك دينيا من عبادات و أخلاق إنت لن تجرؤ تترك فرض واحد…و مش حتعرف تقعد مرتاح البال كده أو مبسوط لو الأدان أذن و إنت لسه مصلتش…لأن ساعتها ربنا ليه عندك قيمة..ساعتها الصلاة ليها معني عندك..مش كجرد حركات و كلام بتعمله لأ ليها معني أكبر من كده بكتير

طول عمري بأسمع عن حديث شريف بيقول “من لم تنهاه صلاته عن الفحشاء و المنكر فلا صلاة له”.و طول عمري بأفهمة بشكل معين زي ما كل الناس بتفهمه…لكن دلوقتي بس فهمته بطريقة تانية خالص…إنت فعلا لو صلاتك لم تنهك عن الفحشاء و المنكر فلا صلاة لك…مش علشان مش مقبولة منك لأ ده في علم الغيب..بس عشان إنت حتما ولابد حتتركها عاجلا أم آجلا…لأنه الصلاة بالنسبة لك أصبحت مجرد فرض و مجرد كلمات و حركات تقوم بها و ليست معني

لم تصبح للصلاة قيمة عندك فحتصلي ليه؟؟ التحصيل مش موجود فليه الصلاة تكون حاصلة؟؟

أنا كل الكلام ده جه في دماغي لأني من الناس اللي بتيجي عليهم كبوات كتير ومن طلوع و نزول في الإيمانيات و الروحانيات و العبادات و الفروض..و بأستغرب ليه كدهو إيه العمل و إيه الحل…لحد ما قعدت أفكر و أنا بأكلم ربنا و ده اللي عقليتي البسيطو توصلتله
لو ظبط كل حاجة في دينك و عباداتك و أخلاقك…بدون أدني مجهود حتلاقي صلاتك إتظبطت لوحدها من غير ما تحس حتي

و صدقوني مهما كان معاك فلوس او صحاب أو أي شئ……..راحة البال و السعادة هم أشياء لن يفهمها أبدا أبدا أبدا…تارك الصلاة

Posted on March 26, 2012, in Daily Diaries, Life...From my point of view, Religion And Spirtuals, Spilled Thoughts....Deep ones. Bookmark the permalink. Leave a comment.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: