رأيي في عدم مقاطعة شركات المحمول

الحملة الجديدة السائدة الأن في مصر و بكل شدة هي حملة “قاطع شركات المحمول اللي قتلت الثوار”…و كل كل الناس بيحث و يحفز كل أصحابة يقفلوا موبايلاتهم يوم 28 تخليدا لذكري الشهداء و علشان نعرف شركات المحمول إننا مش ناسيين…و أنا متأكد إن في ناس كتير
أول ما سمعت عن الحملة إقتنع بها فورا و أخذ يقنع الجميع بها و أن عدم المشاركة بها تخاذل من غير ما يبذل من وقتة أقل من 5 دقائق للتفكير في هذه الحملة و الإنسياق وراها عميانيا مثل الحال مع الحملة السابقة المثيرة للضحك ” إشتري المصري”.

أولا فليتذكر الجميع أن من قتل أولادنا ليسوا شركات المحمول يا سادة…دول الشرطة المصرية و النظام السابق و الحالي…حملة زي دي لو إتعملت يوم 28 كل سنة حتخلي الأجيال القادمة فعلا تظن إن شركات المحمول هي السبب الرئيسي لقتل أولادنا و ننسي القاتل الحقيقي.

طيب هل ينكر أحد فيكم دور الشرطة في قتل شهدائنا؟؟ ليه معملتوش حملة لمقاطعة مصالح الشرطة الحكومية في هذا اليوم؟ ولا علشان نش حتقدروا تستغنوا عنها؟؟

طيب و إنت بتقول قطع الإتصالات أدي إلي قتل أولادنا علشان اللي نزفوا حتي الموت لعدم قدرتهم علي الإتصال بالإسعاف …طب هو مش إنت لو قفلت موبايلك ممكن يحصل نفس الكلام؟ مش ممكن حد من عيلتك يكون بيموت و إتصل بك أول واحد و يمكن تكون أخر واحد؟ مش يمكن واحد صاحبك عمل حادثة فظيعة و أول حد جه علي باله يكلمة ينقذه هو إنت و مكنش عندة الفرصة أو الوقت يعمل المكالمة التانية !!!!! فرقت إيه إنت كده ؟؟ ما انت بنفس المنطق بتاعك ممكن تقتل حد…حتقول لي مش في نيتي…يبقي لازم تعترف إنه هم كمان مكنش في نيتهم

تاني حاجة الحملة بتقول برضه قاطعوهم علشان يخسروا يومها….يا عيني علي العقل…ماذا يضر شركات المحمول إن الناس تقفل موبيلاتها يوم؟؟ علي أساس إن الشعب المصري ماشي الموبايل علي ودنه 24 ساعة؟ ده تلات إربع الناس موبيلها مفهوش رصيد؟ ليه شركات المحمول مش بتتضر ساعتها…و لو فرضنا فرضا مستحيلا إن ربع الشعب فعلا إنضم لحملة و قفل تليفونه ( مع إنها مش حتعدي 5 % من الشعب ) يا سادة يا كرام مكاسب شركات المحمول مكاسب خرافية تقدر بالمليارات و ليس بالملايين اليوم ده مش حيفرق معاها بنكلة

ثالث نقطة بقي و هي أهم نقطة ….ما ذنب شركات المحمول؟ أيييوه ما ذنبهم .

في قانون الإتصالات و العقود المبرمة مع تلك الشركات بند واااااضح و صريح جدا يلزم الشركات بقطع الخدمة بناءا علي أمر من الأمن في حالات الخطر و الأوقات التي تهدد الأمن القومي. البند ده موجود في العقد يعني أولا الشركات معملتش الكلام ده بمزاجها ده غصب و إقتدار. حلاقي واحد عامل نفسة الثوري الخرافي الذي لا يقبل بالحلول الوسط يقول لك كان لازم يرفضوا الأمر.

يا بااااشا كيف يرفضوا شئ ملزم عليهم في العقود و الرخص بتاعتهم….إزاي يقول لأ مش حأقطعها و في ظل نظام أعتي و أكثر جبروتا من فرعون. دي الرخصة تتسحب في ثانية و يتخرب بيت أم الشركة و كل العاملين فيها و العاطلين يزيدوا بدل ما يقلوا…إنت لو صاحب الشركة دي عمرك ما حتعمل كده…كما إنه لا يصح أو يعقل أن تطالب من أحد أن يكون ثوري….الثورية نزعة داخلية…مينفعش تأمر صاحبك ينزل ميدان التحرير و تشتمه لو منزلش.

لو مدير الشركة أمر مديرك المباشر يخصم لك يوم و مديرك المباشر خصم يوم دون أي وجه حق؟ يبقي ده ذنب مين ؟

إحنا دلوقتي بقينا عاملين زي المثل الي بيقول مقدرش علي الحمار يتشطر علي البردعة…إحنا بقي بنتشطر علي البردعة اللي ملهاش أي ذنب…عاملين بالظبط زي ما كنا أيام مبارك..كنا منقدرش ننتقدو أو نشتمة أو حتي نجيب سيرته بأي حاجة وحشة فكنا بننتقد و نشتم الوزراء  و نعمل نفسنا ثوريين و مبنخفش بقي من أي حاجة و معارضو و كان اللي عاوز يبقي إسمه معارضة و الناس تحبة يشتم أي وزير مع إن كل الناس هارفين إن الفساد سببه الرئيسي و الأساسي هو مبارك و أن الوزراء دول كانوا مجرد نمل جنبه و مجرد مساعدين…لكن كنا بنتشطر علي البردعة .

لو إحنا فعلا هاوزين نضمن إن الكلام ده ميتكررش يبقي لازم نفكر تفكير صحيح و ثوري برضة…إحنا عملنا ثورة و أدت إلي وقوفنا في طوابير ساعات ننتخب مجلس الشعب اللي فعلا بيعبر عن الشعب…يبقي التفكير السليم إن كل الناس تروح للنواب بتوعها يطالبوا بتغيير و تعديل هذا القانون الذي سمح و ممكن يسمح تاني و تالت للأمن إنه يقطع الإتصالات….يا قوم إعقلوا أي حاجة بتسمعوها و إبذلوا من وقتم الثمين جدا جدا 5 دقائق تفكروا في الشئ قبل ما تقرروا تنفذوا علي طول كده.

شكرا لحسن إستماعكم و ربنا يسامح أي حد شتمني أو إتهمني بشئ ظلم بسبب التدويمة دي🙂

Posted on January 28, 2012, in Daily Diaries, Egypt...And Egyptians, Politics. Bookmark the permalink. Leave a comment.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: