جعلوني طبيباً –2- يوم ظهور النتيجة بعد الثانوية

لو (حرف شعلقة في الجو) كنت بتسأل ايه علاقة ده في بالموضوع الرئيسي فأحب أقول لك ان ده أهم حاجة….هو في حاجة رمتنا الرمية السودا دي غير مذاكرتنا في الثانويه بجِدٍ و إجتهاد؟؟ يا ريتنا ياخويا ما جبنا مجموع يرمينا في المشرحة دي

يوم ظهور النتيجة ده كارثة نفسية بكل المقاييس لكل طالب ثانوي كادح غلبان…أما الجنة و نعيمها..أما النار و بئس المصير.
و هو ده حلاوة شمسنا..قصدي مجتمعنا اللي بيرعب الواحد و يخليه يفكر انه لو فشل في تحقيق حلمه في حاجه حيفشل طول عمره…الله يمسيك بالخير يا بيل جيتس لو كنت في مصر كان زمانك بقيت فاشل!!

يوم ظهور النتيجة يا أعزائي الطلبة بيكون عادةً ليه تمهيدات قبلها بيومين كده ..و التمهيدات دي بتتمثل في إنك لما تمسك الريموت و تفتح شاشة التليفزيون (بالنسبة للناس اللي مبلطه في البيت و عندهل فراغ) تجد إعلان يقول لك …إتتصل علي 0900 و إعرف نتيجة الثانوية قبل أي حد تاني (علي أساس مثلا إني خلاص حأموت و أعرفها) و طبها بيتخلل الأعلان ده موسيقي خلفية لأغنية الناجح يرفع إيده..و كم من طالبٍ شُلت يداه و مرفعش ايده
و برضه من ضمن سلسلة التمهيدات انك لما تخش علي اي موقع إلكتروني تلاقي حاجه نطت لك في وشك كده تشير الي اللينك لمعرفة النتيجة …و ده طبعاً كلنا جربنا و عرفنا أنه خدعه و مفيش أي حاجه عليه غير حرقة الدم أثناء ظهور الموقع (ده لو انت ديال اب و النت بتاعك بطئ)

دلوقتي بقا تبدأ الحرب النفسية العصبية اللولبيه و دي بقا بتؤدي الي انك تمشي ركبك تختط في بعض في الشقة ..ده لو كان لسه فيك نفس تمشي….و الفترة العصيبة دي بتتميز ان مثلا أي مكالمة تيجي علي تليفون بيتكم مخك يهلوس و تبدأ الخرافات…و تفتكر إن عمتك كلمت أمك تقولها علي النتيجة و انت أعصابك بتتفرك ولا كأنك قاعد علي شواية فحم…لكن سرعان ما ينقشع هذا الشعور لما تعرف إن المكالمة كانت من خالتك اللي بتشكي لأمك مديحة جارتها عملت ايه في فوزية الشغالة (و ساعتها حاول تمسك لسانك..عيب تغلط في خالتك دي زي أمك برضك..إلزم أعلي درجات ضبط النفس زي الشرطة المصرية كدة) .

و ييجي بقا اليوم الفعلي للنتيجة..و ده ليه علامة واضحة جدا لما تلاقي لأبوك فاتح الجرنان و انت تلمح صور اوائل الجمهورية علي الصفحة الأولي من الجريده الأولي في الوطن العربي..الأهرام.
و إحتمال و انت معدي تتهف في مخك و تقول لأبوك صباح الخير يا بابا …أوعييي..لأنه حبرد عليك يقولك جتك خيبة تفرق اية عن أوائل الجمهورية يا ابن ال*** أحسن منك في ايه يا ** (و انت من جواك بتضحك و تقول يا حج ربنا يستر و أجيب مجموع يدخلني الكلية) .
و من هنا نتطرق سريعا لموضوع رفيع ..و هو ازاي كل الاهالي بيبحثوا علي صورة ولادهم من ضمن العشر الاوائل؟؟ و سبحان الله كلهم . أمال ميين اللي حيكمل بقية الترتيب إذا كان البلد كلها أوائل
ححكيلكم قصة حقيقية . واحد صاحبي أصغر مني بسنتين كده يوم النتيجة أبوه قعد يدور علي صورته في كل الجرايد عشان – بيقول – انه كان متوقع انه يطاع من الاوائل..الآخر الواد ده جاب 60% … صدمة طبعا…علشان كده لازم الاهالي يبطلوا العادة دي

المهم نرجع لموضوعنا و هو يوم النتيجة المشهد كان انك شفت الاوائل في الصفحة الاولي للجرنان…ساعتها علي طول تعرف ان النتيجة حتنزل علي موقع مصراوي بليل(بس بتلاقي الموقع تقيل من الضهر..ناس معندهاش صبر)
في اللحظة دي كل واحد بيعرف إن الحساب قرب فبيخترع طريقة للهروب المؤقت من البلوة
في اللي بيخرج و في اللي بيخش الحمام يقعد يومين بي الغالبية العظمي بتناااااااام… او بالأصح يعمل نفسه نايم علي السرير.
انا فاكر اليوم ده نمت فوق ال18 ساعة لحد ما جسمي وجعني…ثم تأتي اللحظة الفارقة ..يا إما صويتة او شتيمة يا إما زغروطه
طبعا احنا (معشر الأطباء) سمعنا زغروطه و كان اليوم ده من أسعد لحظات حياتنا ..ملئ بالتهاني الحارة و المباركات و الفلوس نازلة عليك ولا أجدعها راقصة في شارع الهرم.

يااااه لو الناس تعرف اللي فيها…كانوا ييجوا لابسين خير اللهم اجعله خير اسود في أسود و معاهم عيش و حلاوة ..لزوم السجن المؤبد اللي انت دخلته ..و سعيكم مشكور يا جماعة.

ده كان الجانب العائلي فب الموضوع..نيجي للجانب التاني بقا الا وهو انت و صحابك.
انت اول ما تسمع ال99% اللي انت جبتها من هنا تركبك التناكة علي طول ..خلاص بقا ما انت بقيت دكتوووور ميين قدك..(ده انت حتشوف ايام سودا) …و عامة كل مل التناكة تزيد دي بيبين قد اية انت شخصيه واطية.
و يا سلام بقا لما تنزل بليل كدة تقعد علي القهوة مع صحابك (او الكافية لو معاك قرشين زيادة) ..تلبس الحتة الزفرة اللي علي الحبل و تتمنجة و تحط رجل علي رجل …يمكن حتي كمان شوية تفرقع من كتر النفخة أو تبتدي تطلع دخان.
و في هذا اللحظة يبدأ الإعداد للقائمة…قائمة الناس اللي انت مش حتعرفهم تاني اول ما تخش الكلية و الناس اللي حتقاطعها لما توصل للعلالي و تتجسد أحلام اليقظة أمام عينيك.

و تمر الأيام و الليالي و يأتي يوم تقديم الأوراقفي الكلية..أول ما تخش من باب الكلية و تلاقي الأسر بتتكالب عليك لدرجة انك ممكن تحس انك كنز وطني او مخلوق معرض للإنقراض..انت بتفتكر إن ده حسن إستقبال و ده بيزيد من إعجابك الزائف للكلية لكن سرعان ما سيزول هذا الشعور عندما تعرف الحقيقة المرة..و هي ان الأسر بتعمل كده لمجرد تحسين صورتهم أمام الطلبة علشان لما ينزلوا إنتخابات إتحاد الطلبة تعطيهم صوتك ( زي الحزب الوطني كده) او حتي أضعف الإيمان تنضم ليهم في الأسرة و تبقوا كلكم أسرة سعيده كده ان شاء الله.

ثم تأتي لحظة الكشف الطبي اللي غالباً مس بيطلع فيك غلطة و تلاقي نفسك بمب و لائق و تصلح لكلية حربية حتي …كله كله بيأخد لائق .
طب ده انا و إلهي العظيم في الكشف الطبي كنت أيامها بلبس نظارة و نظري ناقص 7 (قبل ما أعمل عملية الليزك) و الست بتاعت الكشف كتبت لي إن نظري 6/6
و بعدين نروح بقا نقف في طابور العيش اللي هوا عندنا طابور الخزنة لدفع المصاريف (علشان كده في ناس مس يتدفع المصاريف غير ال6 سنين علي بعد عشان يعمل بحق وقفته) و هنا بقا بتبدأ أول لحظات إزدراءك للكلية لما تقف ساعتين علشان تدفع المصاريف و في الآخر الشباك يقفل قبل ما أنت تدفع …بس انت بتهون علي نفسك و تقول معلش كله في سبيل الطب..و بعدين ده أنا حدفع 100 جنيه في السنة و الآخر حسب كلام أمي و لأبويا حيجيلي الاف…أحسن إستثمار.
أحب أقولك هأأوو إبقي سلملي علي الإستثمار

و بعد لما تخلص الدوخة دي كلها تيجي لحظة برضة من أسعد لحظات حياتك..اللي هي و انت بتشتري مستلزمات سنة أولي من قدام الكلية. السماعة…البالطو…جهاز الضغط..و في الأخر كل ده بيترمي في الدرج و مالوش أي تلاتة لازمة ( ما عدا طبعا البالطو ..اللي عامل هسهس لبعض الدكاترة علي أساس إنه يونيفورم مهنتنا المبجلة مع إن سبحان اللة الميكانيكي و المهندس و الصيدلي و الجزار بيلبسوا بالطو برضه) و أول ما تدفع الفلوس عند الراجل و يديلك الحاجات في الكيس تبتدي تحس إنك دكتور …ثم تتوالي الأيام لتأتي أول أيام الدراسة
و يسعني أن أقول لك….أهلا بك في المحرقة.

Posted on October 27, 2011, in My Comic Writings. Bookmark the permalink. Leave a comment.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: